3. Die wêreld, geloof en geloofsgemeenskap
Wat sien ons vandag in die wêreld om ons? Ons sien groot kontraste. Soos nog altyd sedert die Sondeval. Welvaart en armoede, vrede en stryd, ontwikkeling en besoedeling. Ons sien ‘n gebroke wêreld. Op geestelike gebied sien ons in die Westerse wêreld en die voormalige Oosbloklande ‘n proses waar die grootste deel van die bevolking sedert die Tweede Wêreldoorlog die Christelike geloof verlaat het en apaties of afwysend daarteen staan.
En ons sien hierdie kontraste in ons eie lewens en die van ons familie en vriende. Siekte en gesondheid, vreugde en verdriet, depressie, selfdood, beproewing en vrede. Geloof en ongeloof.
Ons sien mense wat in gevaarlike lande met groot persoonlike opoffering en risiko die Evangelie gaan uitdra en ons sien mense hier om ons wat die geloof van ander afkraak.
In dele van Afrika en sekere Oosterse lande is daar ‘n beduidende ontvanklikheid vir die Christelike boodskap. Kerke en geloofsgemeenskappe groei daar daagliks. In die VSA is die kerkgemeenskappe nog veel meer aktief as in die res van die Weste en in die voormalige Oosbloklande.
Suid-Afrika - ‘n tradisioneel Christelike land
Waar staan ons nou? Dink na oor jou kollegas en vriende en familie. Hoeveel van hulle besoek die kerk selde of slegs per geleentheid? Hoeveel van hulle volwasse kinders kom nie meer na die kerk nie, behalwe miskien om te trou of ‘n kind te laat doop? Hoeveel van hulle sê hulle glo in God, maar dink nie dit is nodig om deel van ‘n geloofsgemeenskap te wees nie? Hoeveel van hierdie mense het geen aktiewe geloofslewe meer nie?
As mens vandag ‘n opname onder aktiewe lidmate van al die denominasies sou doen oor wat hulle van hulle volwasse kinders se geloofslewens dink, dan sou daar ‘n duidelike kommer tevoorskyn kom.
Die Afrikaanse gemeenskap is tradisioneel as baie godsdienstig beskou. Min Afrikaanssprekendes het vroeër openlik hulle ongeloof bely of openlik verklaar dat kerk en geloof nie ‘n aktiewe rol in hulle lewe speel nie. Dit het by wyse van uitsondering gebeur. Maar hierdie wiel het gedraai en daar is vandag baie voorbeelde van openlike ongelowiges, waaronder bekende persone. Dit lei tot vraagtekens in mense se gemoedere en maak dit vir sommige mense makliker om ook in daardie rigting te beweeg.
Baie van hierdie mense maak die sagter uitspraak dat hulle nie ongelowig is nie, maar dat hulle geen behoefte aan kerklidmaatskap of aktiewe geloofsbeoefening het nie. Sekularisme is ‘n groeiende verskynsel in Suid-Afrika in die algemeen en ook in die Afrikaanse gemeenskap. Dit kan beskryf word as ‘n benadering wat apaties, afsydig of vyandig staan teenoor godsdiens. Nie net teenoor die Christelike geloof nie, maar enige geloof in ‘n opperwese. Spottende en neerhalende uitlatings oor geloof en teenoor gelowiges verskyn toenemend in die Afrikaanse media en ook op sosiale media.