4. Hoe word die Christelike geloof vandag uitgedaag?
Dit vind op beide direkte en indirekte wyse plaas. Selfs die psigologiese behoefte aan sekuriteit speel ‘n rol. As dit met ‘n mens goed gaan dan voel jy meer in beheer en die besef van ‘n gebroke wêreld, die behoefte aan genade en ‘n goddelike beskerming kan vervaag. Gelowiges moet altyd die regte perspektief behou oor sake soos welvaart, vrede en gemak.
Sekere mense het so beïndruk geraak met die ontwikkeling van die wetenskap dat hulle alle antwoorde daar soek. Ontdekkings t.o.v. die uitdyende heelal waar die son en die aarde ‘n onindrukwekkende plek beklee asook die ontwikkeling van lewensvorme het nie net letterlike en fundamentalistiese Skrifinterpretasies onder druk geplaas nie, maar selfs talentvolle teoloë na ongeloof verlei.
‘n Baie belangrike aspek van die konflik tussen gelowiges en ongelowiges vandag is die oënskynlike onversoenbaarheid van ‘n liefdevolle God met Kwaad en Lyding in die wêreld. Die verwoesting wat Israel in Kanaän in opdrag van God moes uitvoer word gereeld opgehaal.
Ander mense se geloof vervaag as gevolg van hulle daaglikse ervarings. Hulle beleef niks bewustelik van God nie. Hulle ervaar die lewe en die wêreld bloot as iets wat deur natuurwette en sosiale strukture beheer word. ‘n Lewe ná die dood is vir hulle onwerklik en ondenkbaar.
Wat is die rede vir die geloofsvervlakking van die gemiddelde persoon, Suid-Afrikaner, Afrikaanssprekende? Daar is sekerlik meer as een verklaring. Een ooglopende verklaring het te doen met die invloed van sosiale interaksie. En dit werk verskillend vir verskillende ouderdomsgroepe. Dit is ‘n onderwerp vir baie nadenke en gesprekke. Kortliks net die volgende:
As almal met wie jy daagliks omgaan, ‘n ooglopend aktiewe geloofslewe lei en dit ook met jou deel, versterk dit die vertrouenskomponent van jou eie geloof. As jy voortdurend in ‘n neutrale sosiale omgewing verkeer, dan kan (nie noodwendig sal nie), dit jou eie geloofslewe laat verskraal. En as jy deurlopend blootgestel word aan die skeptisisme of sinisme van ongelowiges, raak die kans groter dat jyself kan begin twyfel, of jou ingesteldheid teenoor geloof kan verander. Sosiale ondersteuning speel dus ‘n belangrike rol.
Dink na oor die waarde van Bybelstudiegroepe, geloofsfamilies en van die jeugverenigings van vroeër. Die bymekaarkom op ‘n Vrydagaand was deel van die jongmense se sosiale lewe. En hulle het dikwels ander vriende saamgebring.
Om oor na te dink:
Die Wederkoms van Christus mag vir iemand onwerklik en ondenkbaar ver klink van waar ons nou is. Maar ‘n mens se eie dood is nie ondenkbaar ver van hierdie oomblik af nie. Dink aan jou grootouers, ouers en ander mense wat jy nog as aktiewe en gesonde mense ervaar het en uiteindelik as bejaardes oorlede is. Die tyd vlieg. Dink aan jong en middeljarige mense wat onverwags oorlede is. Elke mens se dood is ‘n beslissende moment vir sy ewige bestemming. As niks anders in hierdie boekie jou tot nadenke stem nie, gaan dink hieroor na. Dit kan vandag met jou gebeur. Lees weer die verhaal van Lazarus (Lukas 16:19-31).