6. Die gesag van die Bybel
As ons geloof op die openbaring van God in die Bybel berus, dan moet ons wel een of ander versekering hê dat die Bybel outentiek en geldig is. Hoe weet ons dat dit nie ‘n versameling mites is wat van geslag tot geslag oorgedra is nie?
Eerstens en baie belangrik, net soos wat vertroue die vernaamste element van ons geloof in God is, is vertroue in die egtheid van die Bybel die vernaamste element van ons aanvaarding van die gesag daarvan. Hierdie vertroue word deur die Heilige Gees in ons harte bewerk. Maar daar is ook sterk aardse getuienis oor die egtheid van die Bybel.
Ons lees in die Bybel dat God deur sy Woord sy openbaring aan die mens oordra. En die Bybel dra self ook sekere merktekens van die egtheid van hierdie openbaring. Ons sien dit in Ou-Testamentiese profesieë wat reeds vervul is wanneer die Nuwe Testament geskryf word. Byvoorbeeld, Jesaja 53 is ongeveer 600 jaar vC geskryf maar dit vertel die toekomstige verhaal van Jesus se lyding en sy verlossing van die mensdom, soos wat dit dan daarna in die Nuwe Testament beskryf word.
Die verskillende Bybelgeskrifte is deur ‘n hele klomp skrywers van verskillende kulture, tale en omstandighede geskryf. Tog vertoon dit ‘n merkwaardige eenheid. Nie ‘n duplikasie soos wat mens sou verwag as dit die produk van ‘n sameswering of blote kopiëring of mites was nie, maar ‘n wesenlike eenheid in die verloop van die hooftrekke van die openbarings en verlossingsplan van God. En tog op verskillende wyses en beklemtonings deur verskillende mense verwoord.
Die Evangelies van die Nuwe Testament dra die merktekens van egtheid. Dit is binne ‘n geslag of twee na die geboorte van Jesus geskryf. Legendes aan die ander kant neem heelwat langer om werklik beslag te kry en dan word dit in die proses gesaniteer van alles wat vraagtekens kan veroorsaak.
Al die Evangelies is dit byvoorbeeld eens dat dit vroue was wat Jesus eerste gesien het na sy opstanding. As ons in ag neem dat vrouens se getuienis in daardie era as onbetroubaar beskou is en nie in ‘n hof toegelaat is nie, dan wonder mens hoekom hierdie feit so pertinent in die Evangelies weergegee is. As die Evangelies net legendes was, sou die verhaal dan nie ‘n meer “polities korrekte” lyn gevolg het om op die getuienis van mans staat te gemaak het nie?
Die Bybel openbaar en verklaar nie vir ons die totale historiese verloop van dinge nie. Ons kry ook net ‘n basiese begrip van bepaalde gebeurtenisse. Ons weet min van die wanneer en die hoe van die skepping van die hemelwesens en die “Eerste Sondeval” toe die Satan as invloedryke engel saam met sy volgelinge teen God in opstand gekom het. As die Bybel werklik mities van aard was en legendes weergegee het, sou hierdie “sensasionele gebeurtenisse” dan nie ‘n baie meer prominente rol gespeel het nie?
Hierdie argumente gaan waarskynlik nie sommer iemand wat reeds ‘n ongeloofsbestemming gekies het, oortuig nie. Maar dit is nie asof so ‘n persoon oor meer oortuigende getuienis tot die teendeel beskik nie. Die gelowige aanvaar die getuienis onder die leiding van die Heilige Gees, terwyl die ongelowige dit bloot verwerp.